Eze 45 | NdeIBE | STEP | “ ‘Lapho usaba ilizwe njengelifa kuzamela wethule kuJehova ingxenye yelizwe njengesifunda esingcwele, izingalo eziyizi-25,000 ubude lengalo eziyizi-20,000 ububanzi; ummango wonke uzakuba ngcwele.

Ezekiel 45

Ukwabiwa Kwelizwe

1 “ ‘Lapho usaba ilizwe njengelifa kuzamela wethule kuJehova ingxenye yelizwe njengesifunda esingcwele, izingalo eziyizi-25,000 ubude lengalo eziyizi-20,000 ububanzi; ummango wonke uzakuba ngcwele. 2 Kulokhu indawo ezingalo ezingama-500 ubude lobubanzi izakuba ngeyendlu engcwele; kulezingalo ezingamatshumi amahlanu eziyizingelezileyo yelizwe elingelalutho. 3 Esifundeni esingcwele linganisa ingxenye ezingalo eziyizi-25,000 ubude lengalo eziyizi-10,000 ububanzi. Phakathi kwayo kuzakuba lendlu engcwele, iNdawo eNgcwele kakhulu. 4 Izakuba yingxenye engcwele yelizwe ingeyabaphristi, abakhonzayo endlini engcwele njalo abasondela eduze ukuba bakhonze phambi kukaJehova. Izakuba yindawo yezindlu zabo kanye lendawo engcwele yendlu engcwele. 5 Ummango ozingalo eziyizi-25,000 ubude lengalo eziyizi-10,000 ububanzi izakuba ngeyabaLevi, abakhonza ethempelini, njengesabelo sabo samadolobho okuhlala kuwo.

6 “ ‘Kumele unike idolobho njengelifa lalo ummango ozingalo eziyizi-5,000 ububanzi lengalo eziyizi-5,000 ubude, obambane lengxenye engcwele; uzakuba ngowayo yonke indlu ka-Israyeli.

7 Inkosana izathatha ilizwe eliphetha eceleni ngalinye lendawo eyisifunda esingcwele lelifa ledolobho. Lizaqhela lisiya entshonalanga lisuka eceleni langentshonalanga njalo liye empumalanga lisuka eceleni langasempumalanga, lilandele ubude kusukela emngceleni wentshonalanga kusiya kowempumalanga osekelane lowesabelo sabantu. 8 Ilizwe leli lizakuba yisabelo sayo ko-Israyeli. Njalo inkosana yami kayisayikucindezela abantu bami kodwa izavumela indlu ka-Israyeli ukuba bathathe ilizwe mayelana lezizwana zabo.

9 “ ‘Nanku okutshiwo nguJehova Wobukhosi: Eselikwenzile kwanele, lina makhosana ako-Israyeli! Yekelani udlakela lwenu lokucindezela lenze okufaneleyo lokulungileyo. Khawulani ukuxotsha abantu bami ezindaweni zabo, kutsho uJehova Wobukhosi. 10 Kumele lisebenzise izikali eziqotho, ihefa eliqotho kanye lebhathi eliqotho. 11 Ihefa lebhathi kumele kulingane, ibhathi lilengxenye yetshumi yehomeri njalo lehefa ingxenye yehomeri; ihomeri lizakuba yisilinganiso esamukelekayo kukho kokubili. 12 Ishekeli lizakuba ngamagera angamatshumi amabili. Amashekeli angamatshumi amabili, lamashekeli angamatshumi amabili lanhlanu kanye lamashekeli alitshumi lanhlanu kuba limina elilodwa.

Iminikelo Lezinsuku eZingcwele

13 “ ‘Lesi yisipho esiqakathekileyo okumele usinikele: Ingxenye yesithupha yehefa kuhomeri ngalinye lamabele lengxenye yesithupha yehefa kuhomeri ngalinye lebhali.

14 Ingxenye emisiweyo yamafutha, elinganiswa ngebhathi, iyingxenye yetshumi yebhathi kukhori ngalinye (elingamabhathi alitshumi loba ihomeri elilodwa, ngoba amabhathi alitshumi alingana lehomeri.) 15 Njalo imvu eyodwa kumele ithathwe emhlambini ngamunye wezingamakhulu amabili emadlelweni ako-Israyeli alamanzi amanengi. Lezi zizasetshenziswa eminikelweni yamabele, eminikelweni yokutshiswa kanye laseminikelweni yobuzalwane ukwenzela abantu inhlawulelo, kutsho uJehova Wobukhosi. 16 Bonke abantu belizwe bazahlanganyela kulesisipho esiqakathekileyo ukuba sisetshenziswe yinkosana yako-Israyeli.

17 Kuzakuba ngumsebenzi wenkosana ukunika iminikelo yokutshiswa, iminikelo yamabele kanye leminikelo yokunathwayo emikhosini, ekuthwaseni kwezinyanga langamasabatha – kuwo wonke amadili endlu ka-Israyeli. Izanikela iminikelo yesono, iminikelo yamabele leminikelo yobuzalwane ukwenzela indlu ka-Israyeli inhlawulelo.

18 “ ‘Nanku okutshiwo nguJehova Wobukhosi: Ngenyanga yakuqala ngosuku lwakuqala kumele uthathe inkunzi eliguqa engelasici uhlambulule indlu engcwele.

19 Umphristi kumele athathe elinye legazi lomnikelo wesono alifake emigubazini yethempeli, ezingosini ezine zelitshe langaphezulu le-alithare lasezinsikeni zesango leguma langaphakathi. 20 Kuzamele wenze khonokho ngosuku lwesikhombisa lwenyanga ukwenzela loba ngubani owenza isono kungasikho ngabomu loba ngenxa yokungazi; ngokunjalo uzakwenzela ithempeli inhlawulelo.

21 “ ‘Ngenyanga yakuqala ngosuku lwetshumi lane kumele kube lomkhosi wePhasika, idili elithatha izinsuku eziyisikhombisa, ngalesosikhathi uzakudla isinkwa esingelamvubelo. 22 Ngalolosuku inkosana izanika inkunzi njengomnikelo wesono izinikelela yona ngokwayo kanye labantu bonke belizwe. 23 Nsuku zonke phakathi kwezinsuku eziyisikhombisa zeDili kumele inike izinkunzi eziyisikhombisa lezinqama eziyisikhombisa ezingelasici njengomnikelo wokutshiswa kuJehova, lembuzi enduna eyomnikelo wesono.

24 Kuzamela inike njengomnikelo wamabele ihefa elilodwa lenkunzi ngayinye lehefa elilodwa lenqama ngayinye ndawonye lehini lamafutha elilodwa kuhefa ngalinye.

25 “ ‘Phakathi kwezinsuku eziyisikhombisa zeDili, eliqalisa ngenyanga yesikhombisa ngosuku lwetshumi lanhlanu, kumele inike okufanayo okomnikelo wesono, umnikelo wokutshiswa, umnikelo wamabele kanye lamafutha.